Molly-Labubu အရုပ်ပုံ မူးယစ်ဆေး ကလေးတွေမစားမိစေရေး မိဘများသွန်သင်ဖို့ ထိုင်းအစားအသောက်နှင့် မူးယစ်ဆေးအာဏာပိုင်အဖွဲ့ ထုတ်ပြန်

မေ ၁၄

ထိုင်း – လာအို နယ်စပ် နောင်ခိုင်ခရိုင်မှာ သိမ်းဆည်းရမိတဲ့ ချစ်စရာ လာဘူဘူ (Molly-Labubu) အရုပ်ပုံ မူးယစ်ဆေးဝါး တွေကြောင့် မိဘတွေဟာ သားသမီးတွေကို ဒါတွေ မစားမိ၊ မစမ်းမိစေဖို့ အထူး သတိပေးသွန်သင်ကြဖို့ ထိုင်း အစား အသောက်နှင့် မူးယစ်ဆေးအာဏာပိုင်အဖွဲ့က မေ ၁၄ ရက်မှာ သတိပေးချက် ထုတ်ပြန်ပါတယ်။

 မိုလီလာဘူဘူဆိုတာ ဟောင်ကောင် ဒီဇိုင်နာ Kasing Lung ဒီဇိုင်းဆွဲ ထုတ်လုပ်လိုက်တဲ့ ဇာတ်ကောင် အရုပ်လေးဖြစ်ပြီး Pop Mart အရုပ်ကုမ္ပဏီက ၂၀၁၉ မှာ ထုတ်လုပ်ဖြန့်ချိရာက သန်းပေါင်းများစွာရဲ့ အချစ်တော် အရုပ်လေးအဖြစ် ပေါ်ပြူလာဖြစ်ခဲ့တာပါ။

ထိုင်းမှာတော့ ကမ္ဘာကျော် ကေပေါ့ပ်အမျိုး သမီးဂီတအဖွဲ့ Blackpink က ထိုင်းနိုင်ငံဖွား လီဆာ သွားလေရာ ဆောင်သွားတတ်တဲ့ အရုပ်ဖြစ်လို့ လီဆာကို ဂုဏ်ပြုဖော်ကျူးတဲ့အရုပ်အဖြစ် သတ်မှတ်ကြပါသေးတယ်။

ဒီအရုပ်ပုံလေးတွေအတိုင်း ထုတ်လုပ်ထားတဲ့ ကလေးစားစရာပုံစံ Molly-Labubu မူးယစ်ဆေးတွေကို ပြီးခဲ့တဲ့ ထိုင်းဆုန်ကရန် သင်္ကြန်ပွဲတော်မှာ စတင်တွေ့ရှိခဲ့ရပါတယ်။ သုံးစွဲသူ ၃ ဦးအနက် ၂ ဦးသေဆုံးပြီး သတိလစ်၊ ကြွက်သားရောင်ရမ်းနာကျင်၊ အသက်ရှူရပ်၊ နှလုံးဖောက်မှု တွေဖြစ်ပွားစေခဲ့တာပါ။

ဓာတ်ခွဲစမ်းသပ်စစ်ဆေးမှုမှာတော့ လာဘူဘူ မူးယစ်ဆေးဝါးတွေဟာ ချစ်စရာကောင်းတဲ့ ကလေး ကြိုက် နို့ခဲ မုန့်ပုံစံ လုပ်ထားပေမယ့် မက်သဖက်တမင်းနဲ့ ICE မူးယစ်ဆေးဝါးတွေအများအပြားထည့်သွင်း ထုတ်လုပ်ထားပြီး သေစေနိုင်တဲ့ မူးယစ်ဆေးဖြစ်ပါတယ်။

ကျောင်းဖွင့်စရာသီမှာ ကိုယ့်သားသမီးတွေကို ဒီလိုအရုပ်မုန့်မျိုးတွေ့ရင် မစားစေဖို့ မိဘတိုင်းက သင်ကြားတိုက်တွန်းထားသင့်ကြောင်း ထိုင်း အစား အသောက်နဲ့ မူးယစ်ဆေးဝါ အာဏာပိုင်အဖွဲ့က သတိပေးထုတ်ပြန်သွားတာဖြစ်ပါတယ်။

Ref: straitstimes