၁၀၇ ရက် ခရီးလမ်း

ဘာသာပြန်သူ – ဇာခြည်ညိမ်း

အခန်း (၃-ခ)

အဲ့ဒီနေ့မှာ ကျမခင်ပွန်း ဒေါ့ က အနောက် ဟောလိဝုဒ် SoulCycle မှာ စက်ဘီးစီးနေတုန်း သူ့ မိတ်ဆွေတစ်ယောက်က အမှီလိုက်လာတယ်။ အဲ့ဒီမိတ်ဆွေနဲ့ အရင် ရှေ့နေအဖွဲ့တစ်ခုမှာ အတူတူ အလုပ်လုပ်ခဲ့ကြပြီး ကိုဗစ်ကာလအတွင်း သူကိုယ့်သူ ဂေးဖြစ်ကြောင်း ကြေညာခဲ့သူပါ။ အတူတူ စက်ဘီးစီး ၊ လေ့ကျင့်ခန်းလုပ်ကြအပြီးမှာ ဒေါ့ က သူ့မိတ်ဆွေ မစ်ချ် နဲ့ သူ့ယောင်္ကျားလေး မိတ်ဆွေ ဘော့တို့နဲ့အတူ ကော်ဖီသောက်နေကြတုန်း ဘော့ က သူ့ဖုန်းကို ငုံ့ကြည့်ပြီး

“ဒေါင် ၊ ခင်ဗျား ဒါမြင်ပြီးပြီလား” လို့ မေးရင်း ဒေါင်ကို လှမ်းပြတယ်။ ဂျိုးဘိုင်ဒင် သမ္မတ ရွေးကောက်ပွဲကနေ နှုတ်ထွက်ကြောင်း ကြေညာချက်ပါ။

“ဟာ… ကျနော် သွားလိုက်ဦးမယ်” ဆိုပြီး ဒေါ့ က ပေ ၁၀၀ လောက်မှာရပ်ထားတဲ့ သူ့ကားဆီ ပြေးတော့တာပဲ။ ကားထဲမှာ သူ့ဖုန်း ထားခဲ့တာကိုး။ ကျမဆီက ဖုန်းတွေ ဝင်နေတာတွေ့သွားတယ် ၊ မိသားစုဝင်တွေက ကင်မလာဆီ ဖုန်းဆက်လိုက်ဦးလို့ စာပို့ထားတာတွေ တန်းစီနေတာပဲ။

“ရှင် ဘယ်ရောက်နေတာလဲ၊ ဒီမှာ ရှင့်ကို လိုအပ်နေတာ” လို့ ကျမ အလောတကြီးပြောတော့

“ဂျိုး မင်းကို ထောက်ခံအဆိုပြုတာလဲ မတွေ့ဘူး၊ ဘာတွေဖြစ်ကုန်ပြီလဲ” လို့ သူပြန်ပြောတယ်။

“စိတ်မပူပါနဲ့ ၊ သူကြေညာပါလိမ့်မယ်” လို့ ပြန်ပြောပြီး သူချက်ခြင်း အိမ်ပြန်လာဖို့ အစီအစဥ်တွေ ခဏပြောကြပြီးတာနဲ့ နောက်ထပ် ဖုန်းတွေထပ်ဆက်ရသေးတယ်။

အဲ့ဒီလို အချိန်မှာ ကျမ ညီမလေး မာယာကတော့ နယူးယော့ခ်ကနေ မီရာ ရထားနဲ့ ပြန်လာတာ လမ်းမှာ ရထားပျက်ပြီး မြို့ပြင်မှာ ပိတ်မိနေပါလေရော။ ကျမ ကိုယ်ရေးအရာရှိ နီယာက ကလေးတွေကို နောက်ဖေးခြံထဲမှာ မိုက်ခ်ပန့်စ် ဆင်ပေးထားတဲ့ ဘတ်စကတ်ဘောကွင်း သေးသေးလေးဆီ ခေါ်သွားလိုက်တယ်။ ကိုယ်တိုင် ထုတ်ဝေသူနဲ့ ဆိုရှယ်မီဒီယာ ကျွမ်းကျင်သူဖြစ်တဲ့ ကျမတူမ မီနာက ကျမရဲ့ လူထုဆက်ဆံရေး အဖွဲ့ နဲ့အတူ တွစ်တာမှာ Kamala HQ အကောင့်အသစ်ဖွင့်ပြီး အချိန်နဲ့တပြေးညီ ဆိုရှယ်မီဒီယာမှာ သတင်းထုတ်ပြန်နိုင်ဖို့ လုပ်နေကြတယ်။

ကျမရဲ့ ကိုယ်ရေးအကျဥ်း ဖော်ပြတဲ့အနေရာမှာ အုန်းပင်ပုံလေး ထည့်ပါလားလို့ တစ်ယောက်က အကြံပေးတယ်။ “အမလေး လုံးဝမထည့်နဲ့နော်” လို့ မီနာက အလန့်တကြား ထအော်လိုက်ပြီးမှ ကျမ သမ္မတဟောင်းတစ်ယောက်နဲ့ ဖုန်းပြောနေတာ သတိထားမိသွားပြီး သူ့အသံကို ကမန်းကတန်း နှိမ့်လိုက်တယ်။

သူက ကျမနားကပ်လာပြီး လာနားထောင်လိုက်သေးတယ်။ ဖုန်းထဲကနေ နယူးယော့ခ်က သမ္မတဟောင်း ဘေလ်ကလင်တန်က သူ့မိန်းမ ဟီလာရီကို လှမ်းအော်ခေါ်တဲ့အသံ ၊ နှစ်ယောက်သား ကျမနဲ့ ပြောဖို့ အလုအယက် လုပ်နေကြတဲ့ အသံတွေ သူကြားသွားသေးတယ်။ သူတို့နှစ်ယောက်က ဒီသတင်းကြောင့် တက်ကြွ ရွှင်မြူးနေကြတယ်။ ကျန်တဲ့ သူတွေကတော့ အေးအေးဆေးဆေး တုန့်ပြန်ကြပါတယ်။ သူတို့အားလုံး ကို “ကျမ နိုင်အောင် လုပ်မှာပါ။ အစွမ်းကုန် ကြိုးစားသွားပါမယ်၊ ကျမကို ထောက်ခံပေးမယ် လို့ မျှော်လင့်ပါတယ်။ အကြံပေးစရာတွေရှိရင်လဲ အားမနာတမ်းပြောပါ” လို့ ကျမက ပြောပါတယ်။

ကျမ ရဲ့ မှတ်စုမှာ –

ဘရက်ခ်အိုဘားမား – တောင့်ထားဟေ့ ၊ ဂျိုးက ငါတို့ မှန်းထားသလို လုပ်တာပဲ။ ဒါပေမယ့် မင်းတကယ် ကြိုးစားမှရမှာနော်၊ မီရှဲယ်နဲ့ ကျနော်က ခင်ဗျားကို ထောက်ခံမှာပါ၊ ဒါပေမယ့် ချိန်ခွင်လျှာအလေးသာအောင်တော့ လုပ်ပေးနိုင်မှာမဟုတ်ဘူး။ ဂျိုးကို ခဏ အချိန်ပေးလိုက်ဦး။ အချိန်ကိုက် လုပ်နိုင်ဖို့ လိုတယ်။

ကလင်တန် မိသားစု

ဘေလ်ကလင်တန် – ဘုရားရေ ၊ တော်သေးတာပေါ့၊ ဘာလုပ်ပေးရမလဲသာပြော ၊ ငါ ဘယ်နေရာတွေ သွားပေးရမလဲ၊ စည်းရုံးရေးစတော့နော်။

ဟီလာရီ – သမ္မတက မင်းကို ထောက်ခံတာ ငါတို့ သိပ်ဝမ်းသာတာပဲ။ ဘာလုပ်ပေးရမလဲ သာပြောလိုက် ၊ ငါတို့ အခုချက်ခြင်း လေယာဥ်ပေါ်ခုန်တက်ပြီး လာခဲ့မယ်။ ရှင့် စစ်ဆင်ရေးအဖွဲ့မှာ ကျမ ပါမှာနော်။

ဂျင်ကလိုင်ဘန် (ကွန်ဂရက် လူမည်းအရေးကော်မတီ ဥက္ကဌ။ သူ့ထောက်ခံမှုကြောင့် ဂျိုးဟာ တောင်ကယ်ရိုလိုင်းနားမှာ အနိုင်ရခဲ့တယ်) – ချကြစို့ ၊ မင်းဘက်မှာ ငါရှိတယ်။

ဂျော့ရှ် ရှပီရို (ပန်ဆယ်လ်ဗေးနီးယား မြို့တော်ဝန်) – မင်းအဆင်ပြေရဲ့လား။ ကျနော် အပြည့်အဝ ထောက်ခံမှာပါ။ ငါ့ပြည်နယ်မှာတော့ ထရမ့်ထောက်ခံသူ တော်တော်များတယ်။ ဒါပေမယ့် ခင်ဗျား သူတို့ကို စိတ်ပြောင်းအောင် လုပ်နိုင်မှာပါ။

ဝက်စ်မိုး (မာရီလန်း မြို့တော်ဝန်) – မင်းက အင်မတန် သစ္စာရှိတဲ့သူပဲ၊ ငါလေးစားပါတယ်။

ပိ ဘူတေးရီး (၂၀၁၉ တုန်းက ကျမရဲ့ အဓိကပြိုင်ဖက်၊ ခုတော့ အင်မတန်ရင်းနှီးတဲ့ မိတ်ဆွေ) – မင်းသာဆို အင်မတန်တော်တဲ့ သမ္မတဖြစ်မှာ။

ရွိုင်ကူးပါး (မြောက်ကယ်ရိုလိုင်းနား မြို့တော်ဝန် ၊ ယခင် ပြည်နယ် တရားရေးရှေ့နေချုပ် ) – ဘာမှ ပြောမနေနဲ့တော့၊ ကျနော် ခင်ဗျားဘက်က အပြည့်အဝ ပဲ။

ချက် ရှူးမား – မင်းသာဆို ထိပ်ဆုံးကနေ အနိုင်ရမယ် လို့ ယုံတယ်။

ဘာနေး ဆန်ဒါ – ကျနော် ဂျိုးကို ထောက်ခံတယ်ဆိုတာ ဂျိုးက အလုပ်သမား လူတန်းစားအတွက် ခိုင်ခိုင်မာမာ ရပ်တည်ခဲ့လို့ပဲ။ ခင်ဗျားလဲ အလုပ်သမား လူတန်းစားအတွက် ဦးစားပေးစဥ်းစားပေးပါ။ ကိုယ်ဝန်ဖျက်ချခွင့် ကိုပဲ အလေးထားမနေပါနဲ့။

ဂရက်ချန် ဝှစ်တမာ – ခင်ဗျား နိုင်မယ်လို့ ယုံတယ်။ ဒါပေမယ့် ကျနော် ခင်ဗျားကို ထောက်ခံကြောင်း မကြေညာခင် လုပ်ဖော်ကိုင်ဖက်တွေနဲ့ စကားပြောပြီး အခြေအနေ ငြိမ်သွားအောင် စောင့်လိုက်ဦးမယ်။

နန်စီ ပလိုစီ – ဂျိုးအတွက် စိတ်မကောင်းဘူးကွယ်။ တော်တော်ဆိုးတာပဲ။ သိပ်စိတ်ထိခိုက်ရတယ်။ ခုတော့ မင်း ကို အဆိုပြုတယ်ပေ့ါ။ လုပ်ထုံးလုပ်နည်းအတိုင်း ရွေးချယ်ဖို့ လိုတယ်။ ငါတို့ပါတီမှာ အရည်အချင်းပြည့်သူတွေ အများကြီးပါကွယ်။ ဆက်ခံသူ တစ်ယောက်ကို ရွေးချယ်လိုက်မယ့်အစား အရည်အချင်းရှိသူတွေ ယှဥ်ပြိုင်စေဖို့ ကောင်းတယ်။

ဂျေ.ဘီ ပရစ်ဇာ – အီလီနွိုက်စ် မြို့တော်ဝန်တစ်ယောက်အနေနဲ့ဆိုရင် ကျနော်က ညီလာခံ စီစဥ်ပေးရတဲ့ သူဖြစ်တဲ့အတွက် တစ်ယောက်တည်းကို ပုံအော ထောက်ခံလိုက်လို့ မဖြစ်ဘူး။

ဂေဘင် နယူးစွမ် – တောင်တက်နေလို့ ၊ နောက်မှ ပြန်ခေါ်မယ်နော် (သူ လုံးဝ ဖုန်းပြန်မဆက်ပါ)

မာခ် ကယ်လီ – (အရီဇိုးနာ အထက်လွှတ်တော်ကိုယ်စားလှယ် ) ကျမ ဖုန်းမခေါ်ရသေးခင် သူ ကျမကို ထောက်ခံကြောင်း တွစ်တာမှာ တင်ပြီးသွားပြီ။

ကျမ ဟာ ဖုန်းတွေတစ်ခုပြီး တခု ခေါ်ရင်း အခြေအနေရဲ့ အရေးကြီးပုံ ၊ အရင်းအနှီး ကြီးလှပုံကို ရှင်းရှင်းလင်းလင်း နားလည်လာသလို စိတ်ဖိစီးမှုတွေက တရိပ်ရိပ်တက်လာပေမယ့် တွေဝေမှုတော့ လုံးဝမရှိပါဘူး။ တချို့လူတွေက ကျမကို ထောက်ခံမှာပါ ဒါပေမယ့် “ပါတီတွင်း ရွေးချယ်မှု က ဘယ်လိုရှိမလဲ” လို့ မေးကြတယ်။

ကျမက ပါတီတွင်း ရွေးကောက်ပွဲ အသေးလေးတစ်ခုလောက် ၊ ဒါမှမဟုတ် တခြား လုပ်ထုံးလုပ်နည်းတစ်ခုခုကြောင့် အလဲထိုးခံရလောက်အောင် အားနည်းတဲ့ နိုင်ငံရေးသမားလို့ ကျမကို ထင်နေကြရင် မှားသွားမှာပေါ့။ ဒီလို ကြီးမားတဲ့အပြောင်းအလဲကြီးလုပ်ဖို့ အချိန်ဘယ်လောက် ထပ်လိုသေးတာလဲ။ ဘယ်လိုလုပ်ကြမလဲ ဆိုတဲ့ လုပ်ထုံးလုပ်နည်းတွေကြောင့် တကယ်လုပ်လိုက်တာထက် ပိုကြာနေတယ်။ အချိန်တွေက တဖြေဖြေး ကုန်နေပြီ။

“ဒါ လုပ်ငန်းစဥ်ပဲ၊ ကျမကို ယှဥ်ပြိုင်နိုင်တဲ့သူရှိရင် အချိန်မရွေး ရှေ့ထွက်လာခဲ့ပါ။ ကျမကတော့ လွှတ်တော်အမတ် အများစုရဲ့ ထောက်ခံမှုကို ရဖို့ ရည်မှန်းထားတယ်။ ခုလဲ စလုပ်နေပြီ”

ဖုန်းတခါခေါ်ရင် နှစ်မိနစ် ၊သုံးမိနစ်ထက် ပိုမကြာပါဘူး။ အပြင်ဘက်မှာ နေအပူရှိန်က ပြင်းလာသလို မီဒီယာတွေလဲ ပွက်ပွက်ဆူနေကြပြီ။

ဒီလို ဝရုန်းသုန်းကားနေ့ကြီးမှာ ဖုန်းခေါ်ဆိုမှုတွေအဆက်မပြတ် လုပ်နေရင်း ကျမ စိတ်တည်ငြိမ်နေမှ ဖြစ် မယ် လို့ သတိပြုမိလာတယ်။ ကျမ အလုပ်တွေ ခဏရပ်လိုက်ပြီး ကျမရဲ့ သင်းအုပ်ဆရာကို ဖုန်းဆက်လိုက်တယ်။ ဘုန်းတော်ကြီး ဒေါက်တာ အမို့စ် စီဘရောင်းဟာ ဒေါက်တာကင်းနဲ့အတူ ပြည်သူ့အခွင့်အရေး အတွက် ချီတက်ခဲ့သူပါ။ သူလဲ ဒီသတင်းကို ကြားပြီးပါပြီ။ သူ့အသံကို အားလုံးကြားရအောင် ကျမ ဖုန်းကို စပီကာဖွင့်ထားလိုက်တယ်။ သူ့ရဲ့ ပညာညဏ်ကြီးလှတဲ့ လေးနက်တည်ငြိမ်တဲ့အသံနဲ့ အတူ ကျမတို့အားလုံး ဆုတောင်းကြတယ်။ ဘုန်းတော်ကြီးက ပြည်သူတွေကို ကယ်တင်ဖို့ ကြိုးစားခဲ့တဲ့ အက်စတာ ဘုရင်မအကြောင်းပြောပြတယ်။

“ကင်မလာ ၊ မင်းလဲ အဲ့ဒီလို အချိန်မျိုးအတွက် မွေးဖွားလာသူဖြစ်တယ်” လို့ သူပြောလိုက်တော့ ကျမ မျက်ရည်ဝဲမိတယ်။ သူက ကျမနဲ့တကွ ၊မိသားစုတွေ ၊ အဖွဲ့ဝင်တွေ ကို စောင့်ရှောက်ပေးဖို့ ဘုရားသခင်ထံ ဆုတောင်းတယ်။ ကျမတို့ လုပ်နေတဲ့ လုပ်ငန်းရဲ့ ကြီးကျယ်မြင့်မြတ်တဲ့ ရည်ရွယ်ချက်အကြောင်း နားလည်စေတယ်၊ ကျမတို့ အားလုံး အဲဒီအခိုက်အတန့်မှာ ပစ္စုပ္ပန်တည့်တည့်အပေါ် နားလည် သတိပြုမိလာစေတယ်။

ပြီးတာနဲ့ အလုပ်ပြန်စရတော့တာပဲ။ အပြင်ဖက်မှာတော့ ညအမှောင်ရိပ်သန်းလာပြီ။ ကျမရဲ့ အစားထိုးစရာမရှိလောက်တဲ့ ကိုယ်ရေးအရာရှိ စတွန်းမ် ဟွန်းကတ်စ်တဲက ကျမတို့အတွက် အသားညှပ်ပေါင်မုန့်တွေ ၊ ပီဇာတွေ ပြင်ဆင်ပေးတယ်။ မာယာလဲ လမ်းမှာပျက်နေတဲ့ ရထားကို ဆက်မစောင့်တော့ပဲ ဝါရှင်တန်ဒီစီ အထိ အူဘာတက္ကစီ ငှားစီးလာခဲ့တယ်။ ဒေါ့ခမျာတော့ အဲ့ဒီညက လေယာဥ်လက်မှတ် ဝယ်မရလို့ ပြန်မလာနိုင်ဘူး။

နောက်တစ်နေ့မှာ ဒဲလားဝဲလ် က မဲဆွယ်စည်းရုံးရေး ဌာနချုပ်ကို သူတန်းလာခဲ့တယ်။ လော့စ်အိန်ဂျယ်လိစ်က အိမ်ကနေ တနေကုန် ကျမကိုယ်စား လူတွေကို ဖုန်းဆက်ပြီး ဝိုင်းကူပေးခဲ့တယ်။ အိမ်နီးနားချင်းတွေက ညနေစောင်းတော့ မနေနိုင်တော့ပဲ “ဒီထက် ပိုဆိုးလာဖို့ပဲ ရှိတယ်၊ ခင်ဗျား ခဏနားပြီး အရက်လေးဘာလေး သောက်ရအောင်ဗျာ” လို့လာခေါ်ကြတယ်။ ဂျော်နီဝေါ့ကား ဘလူးလေဗယ် သောက်ပြီး ဒါတွေဟာ တကယ်ဖြစ်နေတာပါလား လို့ သူ တစိမ့်စိမ့် တွေးမိလာတယ် လို့ပြန်ပြောပြတယ်။

ညနေ ၅ နာရီ ၂၉ မိနစ်မှာ ဗြိတိလျှ အဆိုတော် ၊ သီချင်းရေးဆရာမ ချာလီ အိတ်စ်စီ အိတ်စ်က “ကမလာ တကယ့်ကောင်မ” လို့ ဆိုရှယ်မီဒီယာမှာ တင်ကြောင်း ကျမ ဝန်ထမ်းတွေက လာပြောကြတယ်။ “တကယ့်ကောင်မ” ဆိုတာ သူမရဲ့ နောက်ဆုံး အယ်လ်ဘမ် အမည်ပါ။ ထက်မြက်တယ်၊ စွာတယ်၊ ကိုယ့်ကိုယ်ကို ယုံကြည်မှုအပြည့်ရှိတယ်၊ နွေးထွေးတယ် ဆိုတဲ့ သူမရဲ့ နာမည်ကျော် အယ်လ်ဘမ်နဲ့ ကျမကို တွဲပြီး လူစိတ်ဝင်စားအောင် လုပ်ပေးတာမျိုးပေါ့။ အဲ့ဒီနောက်ပိုင်း ကျမရဲ့ Kamala HQ ဆိုရှယ်မီဒီယာမှာ သူ့ဘရန်းအရောင် အစိမ်းနုရောင် သုံးထားတဲ့ ထောက်ခံအားပေးတဲ့ ပို့စ်တွေ တသဲသဲ ဝင်လာတော့တာပဲ။

ည ၁၀ နာရီထိုးတော့ ဖုန်းဆက်ဖို့ အတော်နောက်ကျနေပြီ လို့ ကျမဆုံးဖြတ်လိုက်တယ်။ ကျမတို့ ဆက်တိုက် အလုပ်လုပ်နေတာ ၈ နာရီကျော်ပြီ။ လူ တစ်ရာကျော်လောက်နဲ့ စကားပြောပြီးပြီ။ ဖုန်းခေါ်ဆိုမှုတိုင်းက အရေးကြီးတယ်။ ဘယ်သူနဲ့ပဲ စကားပြောနေ ပြောနေ ပြောတဲ့စကားတိုင်းကို အလေးထားသလို ပြန်ပြောတဲ့ စကားတိုင်းကို ဂရုပြုဖို့ အာရုံစိုက်ထားရတယ်။ ကျမရဲ့ ထမင်းစား စားပွဲပေါ်မှာ မှတ်စုစာရွက်တွေ၊ အသားညှပ်ပေါင်မုန့် အစအနတွေ၊ စားလက်စ ပီဇာ အပိုင်းအစ တွေပြန့်ကျဲနေတယ်။ ပီဇာလက်ကျန်ကတော့ ဘယ်သူ့ဟာလဲ မမေးနဲ့ ကျမ ပေါ့။

ကျမက ခုချိန်ထိ အားကစားဝတ်စုံနဲ့ပဲ ရှိနေသေးတယ်။ ခေါင်းမဖြီးရသေးတဲ့ ဆံပင်တွေကို စုချည်ထားလက်စအတိုင်းပဲ။ ဘာပဲဖြစ်ဖြစ် ဒီအခိုက်အတန့်ကို မှတ်တမ်းတင်သင့်တယ် လို့ ကျမ ဆုံးဖြတ်လိုက်တယ်။ အပေါ်ထပ် တက်ပြီး ရေမချိုးခင် ကျမ အဖွဲ့ဝင်တွေကို “အခြေအနေတွေက ဒီထက်ပိုပြီး အလုပ်များလာဖို့ပဲ ရှိတယ်။ ခက်ခဲတဲ့နေ့တွေ ရှေ့မှာစောင့်နေကြပြီ။ လုပ်စရာတွေ တပုံတပင်ကြီးပဲ။ ဒါပေမယ့် သိလား မင်းတို့ဟာ ကမ္ဘာပေါ်မှာ အတော်ဆုံး အဖွဲ့ပဲ။ ငါတို့ အားလုံး လုပ်နိုင်မှာပါ။ ခုတော့ ဓါတ်ပုံရိုက်ထားကြရအောင်” လို့ ပြောလိုက်တယ်။

မြင်တဲ့အတိုင်းပဲ “ဝရုန်းသုန်းကား ၊ ကတိုက်ကရိုက်နဲ့ ရှိသမျှ အားအင်တွေအကုန်သုံးပြီး အားကြိုးမာန်တက် လုပ်ခဲ့ကြတဲ့ မပြင်မဆင် ၁၇ ယောက်။ အပြုံးတွေနဲ့။ ပျော်ရွှင်တက်ကြွနေသော သူရဲကောင်းများဟာ တစ်သက်မှာ တခါကြုံရခဲတဲ့ စစ်မြေပြင်ကို ချီတက်ဖို့ အသင့်ဖြစ်နေကြပြီ။

အပိုင်း ၁ – https://spacetd.com/107-days-1_zarchinyeinn

အပိုင်း ၂ – https://spacetd.com/107-days-2_zarchinyeinn

အပိုင်း ၃ (က) – https://spacetd.com/107-days-3_zarchinyeinn