၁၀၇ ရက် ခရီးလမ်း

ဘာသာပြန်သူ – ဇာခြည်ညိမ်း

အမေရိကန် သမ္မတလောင်း ကင်မလာဟဲရစ်ရဲ့ 107 Days The Journey စာအုပ်ကို ဘာသာပြန် တင်ဆက်သူ ဆရာမ ဇာခြည်ညိမ်းထံမှ ခွင့်ပြုချက်တောင်းယူပြီး Space Today ကနေ အပတ်စဉ် တနင်္လာ၊ ဗုဒ္ဓဟူးနဲ့ သောကြာနေ့တွေမှာ တင်ဆက်နေပါတယ်။

အခန်း (၂)

ဇွန် ၂၇

ရွေးကောက်ပွဲမတိုင်မီ ၁၃၁ ရက်အလို

အက်တလန္တာက စကားရည်လုပွဲ စင်မြင့်ပေါ် သူလမ်းလျှောက်တက်သွားတဲ့ပုံကို မြင်လိုက် ကတည်း သူအဆင်မပြေဘူးလို့ ကျမသိတယ်။ သူ့ခြေထောက် အာရုံကြောတွေ အားနည်းနေတာ နှစ်ချီ နေပြီ။ ပြီးတော့ သူ့ ခွေးတွေနဲ့ ကစားရင်း ခြေကျင်းဝတ်အရိုးအက်သွားတယ်။ ဆရာဝန်က ခြေထိန်း ဘွတ်ဖိနပ် ဝတ်ဖို့ အကြံပေးပေမယ့် ဂျိုးက ခေါင်းမာမာနဲ့ တင်းခံတယ်။ ဒါ့ကြောင့် သူလမ်းလျှောက်တဲ့ အခါ ကိုယ်နေဟန်ထား အရင်လို ပုံမှန်ဖြစ်မနေဘူးဆိုတာ သိသာတယ်။ စင်ပေါ်တက်တော့ ဟန်ချက် ထိန်းနိုင်အောင် လက် တွေ ဘေးကိုလွှဲနေတာ စက်ရုပ်တစ်ရုပ်လို ထောင့်တောင့်တောင့်နဲ့။

စကားစစ်ထိုးပွဲအတွက် သူ့ကို စခန်းသွင်းလေ့ကျင့်တဲ့ ဒေးဗစ်စခန်းကနေ ကျမကို ဖုန်းလှမ်းဆက် တယ်။ သူဖုန်းဆက်တဲ့အချိန်က နေတော်တော် စောင်းနေပြီ။ ကျမက လော့စ်အိန်ဂျယ်လိစ် အိမ်မှာ အလုပ်လုပ်နေတဲ့အချိန်။ နောက်ဖေးခြံဝန်းကို မြင်နိုင်တဲ့ နေရာဘက် ထိုင်ခုံရွှေ့လိုက်ရင်း ကျမ က

“အခြေအနေ ဘယ်လိုလဲ” လို့ မေးလိုက်တယ်။

“လုပ်နေတုန်းပဲ ၊အဆင်ပြေပါတယ်” လို့ သူပြန်ဖြေတယ်။

 သူ့အသံက နွမ်းဖျော့ဖျော့နဲ့ ပင်ပန်းနေပုံပဲ။ သူ အအေးမိပြီး ဖျားနေတာ ထည့်မပြောဘူး။

“နားချိန်ရော ရရဲ့လား။ နားချိန် လိုတယ်နော်” လို့ ကျမ သတိပေးလိုက်တယ်။

စခန်းသွင်း လေ့ကျင့်တဲ့အခါ ပြင်းပြင်းထန်ထန် လေ့ကျင့်ပေးပါတယ်။ လိုချင်တဲ့ သန်မာမှုမျိုး ရအောင် မလုပ်ခင် အရင် ကိုယ်ရောစိတ်ပါ ဖြိုချပစ်ကြတယ်။ ကိုယ့်ရဲ့ အားနည်းချက်တွေ၊ စကားမှား တတ်တာတွေ၊ စကားထဲက အကျအပေါက် လစ်ဟာချက်တွေ၊ ပြောဟန် ဆိုပေါက်၊ အသံနေ အသံထားက အစ တခုမကျန် ထောက်ပြပြီး ရက်ရက်စက်စက် ချိုးဖဲ့ပစ်တတ်ကြတာ။ အစပိုင်း ရက်တွေ မှာ ကိုယ့်ကိုယ်ကို ယုံကြည်မှုတွေ ပျောက်ဆုံးပြီး ငါဟာ ဘာမှ အသုံးမကျပါလား လို့ ထင်မိတဲ့အထိ ကိုယ့်အားနည်းချက်တွေကို ရက်ရက်စက်စက် ထောက်ပြနင်းခြေပစ်တတ်ကြတယ်။

ပြီးတော့မှ တစချင်း ပြန်တည်ဆောက်ပေးတာမျိုး။ ဖြစ်နိုင်ခြေရှိတဲ့ စကားလုံးထိုးနှက်ချက်တွေ ကို ထောင့်စေ့အောင် ရှာဖွေပြီး ဘယ်လို တုန့်ပြန်သင့်တယ် ဆိုတာ တဆင့်ချင်း လေ့ကျင့်ပေးလိုက်ကြတာ နောက်ဆုံးတော့ ဘာလာလာ အဆင်သင့်ပဲ လို့ ဖြစ်သွားတဲ့အထိပဲ။ စကားရည်လုပွဲ နီးလာတာနဲ့အမျှ အခုချိန်ဆို ဂျိုးက အဲ့ဒီ အဆင့်ကို ရောက်နေဖို့ ကောင်းပြီ။ ဒါပေမယ့် သူဖုန်းဆက်တော့ အဆင်သင့်ဖြစ်နေ တဲ့ အသံမျိုးမဟုတ်ဘူး။ ကျမ စိတ်ပူသွားမိတယ်။

ထရမ့်နဲ့ ရင်ဆိုင်တဲ့အခါ သုံးသင့်တဲ့ နည်းပရိယာယ်တွေ အရင်က သူနဲ့ ကျမ ဆွေးနွေးခဲ့ကြ ဖူးတယ်။ သူ့ကို တခါတလေ အရေးမပါသလို သပ်ချ လိုက်တဲ့ အခါ သပ်ချ၊ အားနဲ့ အင်နဲ့ ဖိပြောတာမျိုး လုပ်သင့်တဲ့ အခါ လုပ်နဲ့ တစ်လှည့်စီ အလျဥ်းသင့်သလို ရင်ဆိုင်သင့်တယ် လို့ သတိပေးလိုက်တယ်။

သူ့အမေ အကြောင်း ပြန်ပြောတော့ ဂျိုးအသံက နည်းနည်း တက်ကြွလာတယ်။ သူငယ်ငယ်တုန်း က ကျောင်းမှာ အနိုင်ကျင့်ခံရတဲ့အခါ အမေက မင်းကို အနိုင်ကျင့်တဲ့ကောင်ကို ပြန်ချနိုင်ရင် ဆင့် ၅၀ ပေးမယ်လို့ ကတိပေးခဲ့တယ်။ သူက ပြန်ချထည့်လိုက်တော့ သူ့အမေက ကတိအတိုင်း ၅၀ ဆင့် ထုတ်ပေးတယ်။ ဒီအကြောင်း ပြန်ပြောဖြစ်ကြတော့ သူအရင်က စိတ်ခွန်အားမျိုး ပြန်ရလာပုံပဲ။

ကံကောင်းပါစေလို့ ဆုတောင်းပေးတာအပြင် ရှင် လုပ်နိုင်မှာပါလို့ ကျမ သူ့ကို အားပေးစကား ပြောတယ်။ ဖုန်းချ လိုက်ပြီးတဲ့နောက် ကျမ စိတ်ထဲ လေးပြီးကျန်ခဲ့တယ်။ သူ ဒီစကားရည်လုပွဲကို မလုပ်ချင်ဘူးဆိုတာ ကျမ ကောင်းကောင်းသိတာပေ့ါ။ ဒီလို အခြေအနေမျိုးကို ကောင်းကောင်းနားလည် နိုင်သူ ၊ ဖြတ်သန်းမှုတူသူ တစ်ယောက်ယောက်နဲ့ စကားပြောလိုက်ရင် သူစိတ်သက်သာရာ ရမယ်လို့ ယူဆလို့ ကျမဆီ ဖုန်းဆက်တာ လို့ ကျမနားလည်ပါတယ်။

မဲဆွယ်စည်းရုံးရေး စကြတော့ ဂျိုးအနေနဲ့ ထရမ့်နဲ့ စကားရည်လုပွဲ လုပ်သင့်၊ မလုပ်သင့် ဆိုတာကို အငြင်းပွား ကြသေးတယ်။ သူက အစကတည်းက တွန့်ဆုတ်နေခဲ့တယ်။ သူ့ဇနီး ဂျေးလ်ကလဲ စကားစစ်ထိုးဖို့ သဘောမတူချင်ဘူး။ ထရမ့်ကိုယ်တိုင်ကလဲ သူ့ပါတီအတွင်း ယှဥ်ပြိုင်ကြတဲ့အခါ စကားရည်လုပွဲ လုပ်ဖို့ ငြင်းဆိုခဲ့သေးတယ်။ အဲဒီဖြစ်ရပ်ကို ထောက်ပြပြီး ဘိုင်ဒင်ကိုယ်တိုင်လဲ မလုပ်ဘူး လို့ ငြင်းလို့ရတယ် လို့ဝိုင်းပြောကြတယ်။

နန်စီ ပလိုစီ ကလဲ ဘိုင်ဒင်ဟာ လက်ရှိ သမ္မတ တစ်ယောက်အနေနဲ့ ထရမ့်လို ပြီးခဲ့တဲ့ ရွေးကောက်ပွဲ ရလာဒ်ကို လက်မခံနိုင်တာနဲ့ ရာဇဝတ်မှု ကျူးလွန်ခဲ့ကြောင်း တရားရုံးက သတ်မှတ်ထားသူ (အပြစ်သား) တစ်ယောက်နဲ့ စင်မြင့်ပေါ်မှာ စကားစစ်ထိုးရတာ သိက္ခာကျတယ် လို့ ထောက်ပြတယ်။ ဒါပေမယ့် ဂျိုးရဲ့ အယုံကြည်ရဆုံး အကြံပေးတချို့ကတော့ စကားရည်လုပွဲ လုပ်ပြီး ပြည်သူစိတ်ဝင်စားမှု ပြန်ရအောင် လုပ်သင့်တယ် လို့ယူဆကြတယ်။

မဲဆွယ်စည်းရုံးရေးတွေမှာ လူတွေက ထင်သလောက် စိတ်ဝင်စားမှု မရှိဘူး။ ထရမ့်နဲ့ ယှဥ်ပြိုင် ရတဲ့အခါ ခပ်အေးအေးနေလို့ မရဘူး။ မဲပေးဖို့ စိတ်မဝင်စားသူတွေ၊ ဘယ်ပါတီကို မဲပေးရမှန်း ဝေခွဲမရ ဖြစ်နေသူတွေကို ဆွဲဆောင်ဖို့ လိုအပ်တယ် လို့ထောက်ပြကြတယ်။

တရားရေးအရာရှိ ရောဘတ်ဟားရဲ့ စုံစမ်းစစ်ဆေးရေး အစီရင်ခံစာ ထွက်ပေါ်လာပြီးနောက် ဘိုင်ဒင်ဟာ အသက်ကြီးသွားပြီ၊ လုပ်ရည်ကိုင်ရည် ကျဆင်းလာပြီဆိုတဲ့ တီးတိုးဝေဖန်သံတွေက မီးပွားလေးများလိုပဲ လူတွေကြား ပျံ့နှံ့နေတယ် (ဘိုင်ဒင်ဟာ အရင် ဒု သမ္မတအဖြစ် တာဝန်ယူပြီးနောက် အရေးကြီး လျို့ဝှက်စာရွက်စာတမ်းတွေ သူ့အိမ်မှာ ယူထားတဲ့အကြောင်း ၊ တချို့အကြောင်းအရာတွေကို သူ့ကိုယ်ရေးအတ္ထုပတ္တိရေးသူ စာရေးဆရာကို ပေးသိကြောင်း စွပ်စွဲချက်များကို စုံစမ်းစစ်ဆေးတဲ့ အစီရင်ခံစာ)။

တရားရေးအရာရှိ ဟား က သူ့အစီရင်ခံစာမှာ ဘိုင်ဒင်ကို တည်ဆဲဥပဒေများနဲ့ တရားစွဲရန် အခက်အခဲရှိကြောင်း၊ တရားသူကြီးတွေက မှတ်ညဏ်ချို့ယွင်းလာတဲ့ လူအိုတစ်ယောက်ရဲ့ ရိုးသားစွာ မှားယွင်းမှုတစ်ခုသာ ဖြစ်တယ် လို့ ယူဆကြကြောင်း ရေးသားထားတယ်။ အစီရင်ခံစာထဲမှာ ဘိုင်ဒင် ရဲ့ မေ့လျော့တတ်မှုတွေကို အသေးစိတ် ထည့်ရေးထားတယ်။ သူ့အနေနဲ့ ပင်ပန်းလာရင် ဇရာရဲ့ အရိပ်လက္ခဏာတွေ သိသာလာတတ်တာ ကျမသိပါတယ်။ ဒါ့ပြင် စုံစမ်းစစ်ဆေးရေး တွေဆိုတာ စိတ်ရော ကိုယ်ပါ ပင်ပန်းလှတယ်။

သူပြောတဲ့ အဖြစ်အပျက်က အောက်တိုဘာ ၈ ရက်နေ့က ဟာကို ပြောနေတာပါ။ အဲ့ဒီနေ့က ဟာမားစ် က အစ္စရေးကို ဝင်တိုက်တဲ့ နေ့ပေါ့။ ဘိုင်ဒင်ဟာ အထူးစစ်ဆင်ရေး အစည်းအဝေးခန်းထဲမှာ အစည်းအဝေးတွေ ဆက်တိုက် လုပ်နေခဲ့ချိန်။ အချိန်နဲ့တပြေးညီ တင်ပြလာတဲ့ စစ်ရေးသတင်းတွေကို နားထောင်နေရချိန်ပေါ့။ ဖြစ်နေတဲ့ အနိဌာရုံ သတင်းတွေက ပြင်းထန်လွန်းတဲ့အပြင် ဒေသတွင်း စစ်ပွဲကြီး ဖြစ်ပွားလာနိုင်ခြေ ကလဲ ခြိမ်းခြောက်နေတယ်။ မဲဆွယ်စည်းရုံးပွဲတွေ အရှိန်မြင့်လာတာနဲ့အမျှ ထရမ့်ရဲ့ စိတ်ထင်ရာ ပြောနေတဲ့ အောက်လုံး တွေကလဲ ပိုပိုဆိုးလာတယ်။ ဘိုင်ဒင်ကို ခြေလှမ်းမှားတယ် လို့ပြောမယ်ဆိုရင် ထရမ့်လဲ အများကြီး ခြေချော်ခဲ့တာပါပဲ။

ဂျိုးရဲ့ တခြား အကြံပေးနှစ်ယောက်ဖြစ်တဲ့ မိုက်ခ်ဒေါနီလွန်နဲ့ အနီတာ ဒွန်း တို့က မဲဆွယ် စည်းရုံးရေး အစောပိုင်းကာလ ကတည်းက စကားစစ်ထိုးပွဲ လုပ်ပြီး အလဲထိုးထားလိုက်ရင် ရလာဒ် ကောင်းကောင်း ထွက်နိုင်တယ်လို့ ယူဆကြတယ်။ (တကယ်လဲ ဟုတ်ခဲ့ပါတယ်။ ကိုယ်လိုချင်တဲ့ အဖြေ တော့ မဟုတ်ဘူးပေါ့။) ဒီဆုံးဖြတ်ချက်ကို သူယုံကြည်ရတဲ့ အတွင်းလူတွေနဲ့ တိုင်ပင်ပြီး ချခဲ့ကြတာပါ။ နောက်ဆုံးမှာတော့ ဘိုင်ဒင် လုပ်နိုင်မှာပါဆိုတဲ့ သူတို့ရဲ့ ဆုံးဖြတ်ချက်ကို ကျမ က လက်ခံလိုက်ရတော့ တာပါပဲ။

၂၀၁၂ ခုနှစ် ဘရက်ခ် အိုဘားမား မစ်ရွန်နေ နဲ့ ပထမ အကြိမ်စကားရည်လုပွဲ လုပ်တုန်းက ဒုသမ္မတ ဘိုင်ဒင်ဟာ သူ့ပြိုင်ဘက် ပေါလ်ရွိုင်ယန်ကို အပြတ်အသတ် အလဲထိုးလိုက်တာများ ကျွဲရိုင်းကြီး တစ်ကောင် သတ်ကွင်းထဲမှာ ပြိုင်ဘက်ကို ပြားပြားဝပ်နေအောင် နင်းပြီး ဒုန်းစိုင်းပတ်ပြေးနေသလို အရှိန်အဟုန် ပြင်းလွန်းလှတယ်လို့  ဆာရာပါလင်း က ခဏခဏ ပြန်ပြောတတ်တယ်။ ဘိုင်ဒင်ရဲ့ နိုင်ငံတော် အခြေပြ မိန့်ခွန်းဟာ တနိုင်ငံလုံးကို ကိုင်လှုပ်နိုင်တယ်လို့ လူတွေကြား ရေပန်းစားနေတဲ့ အချိန်လဲ ဖြစ်တယ်။ ဒေါနီလွန် နဲ့ ဒွန်တို့ကတော့ ဘိုင်ဒင်ဟာ ၂၀၂၀ မှာ ထရမ့်ကို အလဲထိုးခဲ့သလို အသာလေး လုပ်နိုင်ပါသေးတယ် လို့ ယုံကြည်ကြတယ်။

စကားရည်လုပွဲ လုပ်မယ့်နေ့က ကျမဟာ အနောက်ဘက်ကမ်းခြေတလျှောက် မဲဆွယ်စည်းရုံးရေးခရီး ထွက်နေချိန် ဖြစ်ပါတယ်။ စပိန် ဘာသာနဲ့ သတင်းစာရှင်းလင်းပွဲ လုပ်တယ်၊ အရီဇိုးနားက ပြည်သူတွေနဲ့ တွေ့တယ်။ ကယ်လီဖိုးနီးယားက ရန်ပုံငွေရှာဖွေသူတွေနဲ့ တွေ့တယ်။ လော့အန်ဂျယ်လိစ်က လူမည်း မြို့ခံ နာမည်ကျော်တွေနဲ့ တွေ့တယ်။ အဲဒီနေ့ မနက်က R&B စတား အူရှာနဲ့ တွေ့ပြီး ကျမတို့ဘက်ကို ဆက်ပြီး ထောက်ခံအောင် စည်းရုံးခဲ့သေးတယ်။

စီးပွားရေး လုပ်ငန်းလေးတွေအတွက် ချေးငွေရရှိရေး ကိစ္စပြောဖြစ်ကြတယ်။ ပြီးတော့ BET ဆုပေးပွဲ အတွက် ရုပ်ရှင် မင်းသမီး တာရာဟီ ပီ ဟန်ဆမ် နဲ့ ကိုယ်ဝန်တားဆီးခွင့် ၊ ဖျက်ချခွင့်တွေ၊ မဲပေးခွင့်တွေ အကြောင်း ရိုက်ကူးရေးအတိုလေး လုပ်ရတယ်။ မင်းသမီးဟာ ဆုပေးပွဲ အခမ်းအနားမှာ ထရမ့်တို့ဘက်က တင်သွင်းလာတဲ့ ၂၀၂၅ စီမံကိန်းထဲမှာ ပါဝင်တဲ့ အကြောင်းအရာတွေ အကြောင်း စိတ်ပါလက်ပါ ထောက်ပြခဲ့သေးတယ်။

ညနေရောက်တော့ လော့စ်အိန်ဂျယ်လိစ် ၊ ဆန်ကျူရီ မြို့တော်၊ ဖဲမောင့် ဟိုတယ်က အေးစက်နေတဲ့ အစည်းအဝေး ခန်းမကြီးထဲမှာ ကျမ ဝန်ထမ်း သုံးယောက်နဲ့ အတူ ရုပ်မြင်သံကြားက တိုက်ရိုက်လွှင့်နေတဲ့ စကားရည်လုပွဲထိုင်ကြည့်ကြတယ်။ တခြား ဝန်ထမ်းတွေက ဘေးကအခန်းထဲမှာ ကြည့်နေကြတယ်။ စားပွဲပေါ်မှာ စားစရာ မုန့်တွေတင်ထားတယ်။ ကျမက အားလုံးအတွက် ပီဇာ မှာထားတယ်။ ဒီနေ့ ည အိပ်ချိန်ရှိမှာ မဟုတ်ဘူး။ ကျမတို့ အလုပ်တွေ လုပ်ကြရဦးမှာ။ စကားရည်လုပွဲပြီးလို့ ဘိုင်ဒင် စင်မြင့်ပေါ်က ဆင်းတာနဲ့ နိုင်ငံတဝှမ်းက မဲဆွယ်စည်းရုံးရေး ဝန်ထမ်းတွေ ၊ စေတနာ့ ဝန်ထမ်းတွေ ကို ဖုန်းခေါ်ပြီး အားပေးစကားပြောတာ လုပ်မယ်၊ ပြီးရင် မီဒီယာ လေးခုနဲ့ ရုပ်မြင်သံကြား အင်တာဗျူး လုပ်ရမယ်။ ရုပ်သံမီဒီယာတွေက တိုက်ရိုက်ထုတ်လွှင့်မယ့် အင်တာဗျူးတွေအတွက် စတူဒီယိုကို အဆင်သင့် ပြင်ထားပြီးကြပြီ။

နောက်က လိုက်ရှင်းရမယ့် အကြွင်းအကျန် ကိစ္စတွေ ရှိမယ် ဆိုတာ ကျမ သိပါတယ်။ အမြန် တုန့်ပြန်ရတဲ့ စကားစစ်ထိုးပွဲတိုင်းမှာ ထုံးစံအတိုင်း စကားအစအန ၊ အထအန ကောက်ချင်စရာတွေ အမြဲကျန်ခဲ့တတ်ပါတယ်။ ဒါတွေကို မြန်မြန်ထက်ထက် ရှင်းဖို့ အဆင်သင့်ပြင်ထားရတာပါ။ ဒါပေမယ့် ကျမမှာ စခန်းသွင်းလေ့ကျင့်စဥ်က ဖုန်းပြောဖြစ်တဲ့ အခြေအနေကြောင့် သာမာန်ထက်ပိုပြီး စိတ်လေးနေခဲ့တယ်။

ဒါ့ကြောင့် အဲ့ဒီအချိန် ကျမ နဲ့အခန်းထဲမှာ အတူရှိနေကြသူတွေဟာ ကျမ အယုံကြည်ရဆုံးလူတွေ ဖြစ်ပါတယ်။ စကားရည်လုပွဲ ကို ထိုင်ကြည့်ရင်း စိတ်ထဲရှိတဲ့အတိုင်း ပွင့်ပွင့်လင်းလင်း ပြောလို့ရတဲ့ သူတွေပါ။ ကျမရဲ့ အကြီးတန်း အကြံပေးတစ်ယောက်ဖြစ်တဲ့ ဘရိုင်ယန် ဖဲလွန် က မီဒီယာတွေကို ပါးပါးနပ်နပ် ညင်ညင်သာသာ ကိုင်တွယ်တတ်သူအဖြစ် လူသိများပါတယ်။ တရားသူကြီးများ ခန့်အပ်ပုံ ပြုပြင်ပြောင်းလဲဖို့ အကျိုးအမြတ်မယူတဲ့ အဖွဲ့တစ်ခု ထောင်ထားသူ၊ သူ့အရင် အလုပ်ရှင် ချက်ခ် ရှူးမားကို C rating ပေးခဲ့သူပါ။ ဘရိုင်ယန်က တခြားနိုင်ငံရေး သမားတွေထက် အများကြီးစောပြီး ထရမ့်ဟာ တခြားသူတွေနဲ့ လုံးဝမတူတဲ့သူ ဖြစ်တယ်၊ အဆင့်တင် ကွာတာမဟုတ်ဘူး၊ ထရမ့်နဲ့သာဆို ရှေးရိုးကြီးအတိုင်း လုပ်နေလို့မရဘူးလို့ အစောဆုံး ပြောခဲ့သူဖြစ်တယ်။ ထရမ့်ဟာ သာမာန် နိုင်ငံရေးသမား မဟုတ်ဘူး၊ MAGA ဟာ သာမာန် နိုင်ငံရေးပါတီ မဟုတ်ဘူး။ သူက နိုင်ငံရေးကို တိုက်ပွဲလို့ မြင်တဲ့သူဖြစ်တယ် လို့ သုံးသပ်ခဲ့တယ်။

ကျမရဲ့ ကမ်ပိန်း အရာရှိချုပ် ရှီလာနစ် က ဥပဒေကျောင်းက ဘွဲ့ရပြီးတာနဲ့ ဝါရှင်တန် ဒီစီက ဥပဒေအဖွဲ့ တစ်ခုမှာ အလုပ်လုပ်ဖို့ ရောက်လာခဲ့သူ။ စီနိတ်တာ ဘေ့ာဘ် ကာရေးရဲ့ သမ္မတ ရွေးကောက်ပွဲမဲဆွယ် စည်းရုံးရေး မှာလုပ်ဖို့ ခန့်အပ်ခံရတယ်။ ပြီးတာနဲ့ ဒီအလုပ်ကို သဘောကျသွားတာပဲ။ အဲ့ဒီကတည်းက သူမဟာ မဲဆွယ် စည်းရုံးရေး လုပ်ငန်းတွေနဲ့ ဆိုင်ရာ ကိစ္စရပ်တွေ လုပ်နေရင်း အာဖရိက ဆာဟာရန် သဲကန္တာရက ဆင်းရဲသားတွေ အတွက် အခမဲ့ ဥပဒေအကျိုးဆောင် လုပ်ပါတယ်။ ဂျေးလ်ဘိုင်ဒန်ရဲ့ ဝန်ထမ်းအကြီးအကဲ လုပ်ခဲ့တဲ့အတွက် ဘိုင်ဒန် မိသားစုနဲ့ ဆက်ဆံရေးကောင်းမွန်တဲ့သူလဲ ဖြစ်ပါတယ်။

နောက်ထပ်တစ်ယောက်ကတော့။ ကျမရဲ့ လူထု ဆက်ဆံရေးအရာရှိ ကားစတန် အယ်လန်ပါ။ ပြင်းထန်တဲ့ ရွေးကောက်ပွဲ မဲဆွယ်စည်းရုံးရေး လုပ်ငန်းတွေ၊ ဖိအားကြီးလွန်းတဲ့ အလုပ်တွေကို နိုင်နိုင်နင်းနင်း ကိုင်တွယ်နိုင်သူ ဖြစ်ပါတယ်။ ၂၀၁၈ လောက်က သူမ အန်ဒရူး ဂေးလန်ဆီမှာ အလုပ်လုပ်နေတုန်း ကျမ ကတွေ့ပြီး သဘောကျခဲ့ တာပါ။ အန်ဒရူးက ဖလော်ရီဒါ မြို့တော်ဝန် ရွေးကောက်ပွဲမှာ ရွန်ဒီစန်တစ် ကို ဆံချည်တမျှင်လောက်နဲ့ ရှုံးခဲ့ပါတယ်။ အဲ့ဒီ ရွေးကောက်ပွဲဟာ သမိုင်းတလျှောက် အပြင်းထန်ဆုံး ပြိုင်ပွဲတွေထဲက တစ်ခုပါပဲ။ သူမက ကျမရဲ့ ပြောရေးဆိုခွင့်ရှိသူ နဲ့ ဂျိုးဘိုင်ဒန် ရဲ့ အထူးလက်ထောက်အရာရှိ အဖြစ်လုပ်ခဲ့သလို့ ကိုဗစ် ကာလတုန်းက ကျမတို့ရဲ့ နိုင်ငံအဆင့် ပြောရေးဆိုခွင့်ရှိသူအဖြစ် တာဝန်ယူခဲ့သူပါ။

ဂျိတ် တပ်ပါ ရဲ့ ပထမမေးခွန်းကတော့ ခန့်မှန်းထားတဲ့အတိုင်း စီးပွားရေးအကြောင်းပါပဲ။ ဘိုင်ဒန်က လေသံပျော့ပျော့နဲ့ မြန်မြန် ပြောပါတယ်။ သူ့မျက်လုံးတွေမှာ စိတ်အားထက်သန်မှု အရိပ်အယောင် မတွေ့ရဘူး။ အသံက အားမာန်မပါဘူး။ သူတို့ သူ့ခေါင်းထဲ အချက်အလက် ၊ ကိန်းဂဏန်းတွေ အများကြီး စုပြုံထည့်ပေးလိုက်ပြီ ထင်တယ်လို့ ကျမတွေးမိတယ်။ သူက ကိန်းဂဏန်းတွေပြောတဲ့အခါ လုံးချတယ်။ ပထမဆုံး မေးခွန်းက အမြဲတမ်း ခက်ပါတယ်။ သူ့အနေနဲ့ သွေးပူ လေ့ကျင့်ဖို့ လိုတယ်။ အရှိန်ရလာရင်တော့ ကောင်းကောင်း ထိန်းနိုင်မှာပါ။  စကားရည်လုပွဲ ရုပ်သံကြည့်ရှုရန်

နောက်ထပ် မေးခွန်းကတော့ စစ်ရေးပါ။ သူ့မှာ ပြောစရာတွေ အများကြီးရှိတယ်။ ထရမ့်က ကျမတို့ရဲ့ ကျဆုံးလေပြီးသော စစ်သည်တော်များကို “အလကား ဆန်ကုန်မြေလေးတွေ၊ အရှုံးသမားတွေ” လို့ခေါ်သူပါ။ ဘိုင်ဒင်က ဒီခေါင်းစဥ်ကို နိုင်နိုင်နင်းနင်း ကိုင်တွယ်နိုင်ပေမယ့် သူ့လက်ထက်မှာ ဘယ်စစ်သားမှာ နိုင်ငံရပ်ခြား စစ်မြေပြင်မှာ မကျဆုံးခဲ့ဖူးဘူးလို့ စကားမှား သွားတယ်။ အာဖဂန်နစ္စတန် မှာ ကျမတို့ တပ်ဖွဲ့တွေ ပြန်ဆုတ်တုန်းက ဗုံးပေါက်ကွဲပြီး ကျမတို့ စစ်သား ၁၃ ယောက် ကျဆုံးခဲ့တယ် ဆိုတာ သူမေ့သွားပုံပေါ်တယ်။ အဲ့ဒီပေါက်ကွဲမှု ဖြစ်တုန်းက ကျမ Airforce Two ပေါ်မှာ သူနဲ့ အတူရှိနေခဲ့ပါတယ်။ ဒီဖြစ်ရပ်ကြောင့် ကျမတို့ ခရီးစဥ်ဖျက်ပြီး ချက်ခြင်း ဝါရှင်တန် ဒီစီကို ပြန်လှည့်ခဲ့ကြတယ်။ သူဘယ်လိုဖြစ်ပြီး ဒီလို အဖြစ်ဆိုးကြီးကို မေ့သွားပါလိမ့်၊ အဲ့ဒီ စစ်သား၊ စစ်သမီးတွေအတွက် သူ အင်မတန် စိတ်ထိခိုက်ခဲ့တာ ကျမကောင်းကောင်းသိတယ်။ ဒီကိစ္စဟာ သူ့အတွက် နင့်နင့်နဲနဲ ဖြစ်ရတဲ့ကိစ္စပါ။

တဖက်မှာ ထရမ့်ကတော့ စကားလုံးတွေကို ကျည်ဆန်များလို တရစပ် ပစ်ထုတ်နေတယ်။ ဒါပေမယ့် သေသေချာချာ ချိန်ပြီး ပစ်တာမျိုးတော့မဟုတ်ဘူး။ ထိချင်ရာ ထိ ၊ မှန်တာရော မှားတာရော ဘာမှ ဂရုမစိုက်ပဲ လွှတ်နေတော့တာပဲ။ ဘိုင်ဒန်ကတော့ အချက်အလက် မှန်ကန်ရေးကို အင်မတန် သတိထားတယ်။ မှားသွားတယ် လို့ သိတာနဲ့ စကားမဆုံးသေးခင် ပြန်ပြင်တယ်။ အဲဒီတော့ သူ့စကားသံတွေ ၊ အကြောင်းအရာတွေက ရှင်းရှင်းလင်းလင်း မဖြစ်တော့ဘူး။ တခါတလေ လုံးထွေးနေတယ်။ အရေးကြီးတဲ့ မူဝါဒ ကိစ္စတွေကို ရှင်းရှင်းလင်းလင်း မပြောနိုင်ဘူး။ ဒီအကြောင်းအရာတွေကို သူကောင်းကောင်း ကျေညက်တယ် ဆိုတာ ကျမ သိပါတယ်။ သူကိုယ်တိုင် အစအဆုံး ပါဝင်တဲ့ ကိစ္စတွေပဲဟာ။ ဒါပေမယ့် သူ့မှာ တော်တော် အခက်တွေ့နေပုံ ပေါ်တယ်။

စကားအဆုံးမှာ ဝါကျတွေ ရှုပ်ရှပ်ခက်နေတယ်။ မီလီယံနဲ့ ဘီလီယံကို နှစ်ကြိမ်တိတိ မှားပြောတယ်။ ဂျိုးဟာ သူ့အတွေး နဲ့ အပြောကို တထပ်တည်းကျအောင် မလုပ်နိုင်ဘူး ဖြစ်နေတယ်။ စိတ်ရှုပ်ထွေးနေပုံပေါ်တယ်။ ဗလုံးဗထွေးဖြစ်တယ် “နောက်ဆုံးတော့ ကျနော်တို့ ကျန်းမာရေးစောင့်ရှောက်မှု အစီအစဥ်ကို လုပ်နိုင်ခဲ့ပြီ” လို့ ပြောတယ်။

ထရမ့်က “ဟုတ်တယ် ၊ ဟုတ်တယ် သူ လုပ်လိုက်တာ ၊ တခါတည်း သေရောပဲ” လို့ ပြန်နင်းတယ်။

မိနစ် ၉၀ ပြည့်တဲ့အခါ ဝန်ထမ်းတွေဟာ တဖက်က ရုပ်မြင်သံကြား ဖန်သားပြင်ကို ကြည့်ရင်း တဖက်က ဖုန်းတွေကနေ ဆိုရှယ်မီဒီယာပေါ်က တုန့်ပြန်မှုတွေကို မျက်ခြေမပြတ် လိုက်ကြည့်နေကြတယ်။

“စုတ်ပြတ်သတ်နေတာပဲ”

“ရထားမှောက်သလိုပဲကွာ”

“အရှက်ကို ကွဲတာပဲ”

ခရစ္စတန်နဲ့ ရှီလာတို့ က

“တခြားလူတွေ ရော ဒီမှတ်ချက်တွေ မြင်ကြလား”

“ငါတို့ ထင်ထားသလို တကယ် ဆိုးနေပြီလား” လို့ အပြန်အလှန် စာပို့နေကြတယ်။

ဟောလိဝုဒ်က အလှူရှင်တွေနဲ့ အတူတူ ထိုင်ကြည့်နေတဲ့ ကျမခင်ပွန်း ဒေါင် ကတော့ နားနဲ့မဆန့်အောင် ကြားနေရတော့တာပဲလို့ ဆိုတယ်။ ဒေါင်နဲ့အတူရှိနေတဲ့ ရုပ်ရှင်ဒါရိုက်တာ ရော့ဘ် ရီနားက “မင်းတို့ကြောင့် ငါတို့ ဒီမိုကရေစီ ကို ဆုံးရှုံးရတော့မယ်” လို့ စူးစူးဝါးဝါး အော်ပါတယ်။

နောက်ဆုံးအပိုင်း ခဏ ကြော်ငြာဝင်ချိန်မှာတော့ ကျမ ခပ်မြန်မြန်ပဲ ဆံပင် ကိုသပ်သပ်ရပ်ရပ်ဖြစ်အောင် ပြင်၊ မျက်နှာကို မိတ်ကပ် ပြန်ဖို့လိုက်ပါတယ်။ ဘရိုင်ယန်က အဆင်သင့်ပြင်ထားတဲ့ မိန့်ခွန်းကို ကျမလက်ထဲ လာထည့်တယ်။ ကျမ ဖတ်ကြည့်လိုက်တော့ …

“ဂျိုးဘိုင်ဒန် က အနိုင်ပိုင်းလိုက်ပြီ” လို့ စာလုံးအကြီးတွေနဲ့ ရေးထားတယ်။ “သူ နေမကောင်းတဲ့ကြားက တိုက်ပွဲဝင်ခဲ့တယ်။ အမေရိကန် ပြည်သူတွေအတွက် တိုက်ပွဲဝင်ခဲ့တယ်”

လာ နောက်နေတာလား …

ကျမ စာရွက်ကို စားပွဲပေါ် ပစ်တင်လိုက်တယ်။ ဘိုင်ဒင်ရဲ့ မဲဆွယ်စည်းရုံးရေးဆိုင်ရာ လူထု ဆက်ဆံရေးမှူး က အက်တလန္တာ ကနေ ဖုန်းလှမ်းဆက်ပြီး ဒါနဲ့ ခပ်ဆင်ဆင် သတင်းစကားမျိုး မီဒီယာကို ပြောပေးဖို့ တိုက်တွန်း တယ်။

“ဟင့်အင်း … အဓိပ္ပါယ် မရှိတာတွေ ကျမကို လာမခိုင်းနဲ့၊ လူတိုင်း ထင်းထင်းကြီး မြင်ခဲ့ကြပြီးပြီ”

ကျမ ခေါင်းထဲပေါ်လာတာက ရစ်ချက် ပရိုင်ယာပြောခဲ့ဖူးတဲ့ ဟာသတစ်ခုကိုပဲ။ ရစ်ချက်က တခြားမိန်းမ တစ်ယောက်နဲ့ အိပ်ယာထဲမှာ ဖောက်ပြန်နေတုန်း သူ့မိန်းမက ပက်ပင်းမိခဲ့တယ်။ အဲ့ဒီတုန်းက ရစ်ချက် က “မင်း … ငါ့ကို ယုံမလား ၊ မင်းကို လိမ်ညာနေတဲ့ မင်း မျက်လုံးကို ယုံမှာလား” တဲ့ …

အမေရိကန် ပြည်သူတွေ သူတို့မျက်လုံးနဲ့ မျက်ဝါးထင်ထင် မြင်ခဲ့ရတဲ့ ကိစ္စကြီးကို ကျမ ဖုံးကွယ်ပြီး မပြောနိုင်ဘူး။ ကျမရဲ့ သိက္ခာကို ရောမချလိုက်နိုင်ဘူး။ ဒီညကတော့ တကယ့် ကာလပျက်ကြီးလိုပါပဲ။ ကျမ ပြောမယ့် စကားလုံးတိုင်း ဘယ်လောက်အရေးကြီးတယ်ဆိုတာ ကျမ ကောင်းကောင်းသိပါတယ်။ ဒီကိစ္စကို ဘယ်လိုကိုင်တွယ်လိုက်တယ်ဆိုတာ သူ့အတွက်တင် သာမက ကျမအတွက်ပါ နောင်အချိန် အတော်ကြီး ကြာတဲ့အထိ နိုင်ငံရေး သက်ရောက်မှု ရှိနေမှာပါ။ လူတွေ မြင်လိုက်တဲ့ အဖြစ်ကို ကျမ အသိအမှတ်ပြုရမယ်။ သူတို့ နားလည်နိုင်ဖို့ ကျမ ကူညီပေးရမယ်။

စီစဥ်ထားတဲ့ အတိုင်း စည်းရုံးရေး ဝန်ထမ်းတွေနဲ့ စေတနာ့ဝန်ထမ်းတွေကို ကျမ ဖုန်းဆက်ပါတယ်။ သူတို့ စိတ်အေးလက်အေး ဖြစ်စေဖို့ ၊ အမှန်အတိုင်း ပြောဖို့ လိုအပ်တယ်လို့ ကျမ ထင်တယ်။ စကားရည်လုပွဲမှာ အချိန် ကြာလာတာနဲ့အမျှ ဘိုင်ဒန်က အချက်အလက်ပေါ် အခြေပြုပြီးပြောဖို့ ကြိုးစားပေမယ့် ထရမ့်က အဲ့လို မဟုတ်ပါဘူး။ ထရမ့် လက်လွတ်စပယ် အမှားတွေ ပြောခဲ့သမျှကို မှတ်ထားပြီး ကျမ တချက်ချင်း ပြန်ထောက်ပြီး ရှင်းပြပါတယ်။

အင်တာဗျူးရိုက်ကူးဖို့ ပြင်ထားတဲ့ စတူဒီယိုက သိပ်မဝေးလှဘူး။ ဒါပေမယ့် သေမင်းခံတွင်းဝကို လမ်းလျှောက်သွားနေရသလို လေးပင်လှတယ်။ ကျမ အဖွဲ့ဝင်တွေက ဘေးကရံပြီး လိုက်ပါလာကြတယ်။ အားလုံး စိတ်ဖိစီးနေကြသလို ကျမ ထမ်းပိုးထားရတဲ့ ဝန်ထုပ်ဝန်ပိုးကို သူတို့ နားလည်ပါတယ်။ အမှောင်ခန်းထဲမှာ တောင် ဘရိုင်ယန် ချွေးစေးတွေ ပြန်နေတာ ကျမ မြင်ရတယ်။ မဲဆွယ်ရေးအတွက် ပြင်ဆင်ထားတဲ့ စကားတွေ အပြင် ပိုကောင်းတဲ့၊ ဒီအခြေအနေကို ထိန်းနိုင်မယ့် တခြား စကားလုံးတွေ အချိန်မီ စဥ်းစားလို့ မထွက်ဘူး ဖြစ်နေတယ်။

ကျမ သူ့ကို ကြည့်လိုက်ပြီး “အဆင်သင့်ဖြစ်ပြီ” လို့ အသိပေးလိုက်တယ်။

CNN က သတင်းတင်ဆက်သူ အန်ဒါဆင် ကူးပါးကို မျက်နှာမူပြီး ကျမ ကိုယ်နေဟန်ထားကို သတိထား ပြင်လိုက်တယ်။ ကျမ အဖွဲ့သားတွေကို မကြည့်တော့ဘူး။ တကယ့် ပြည်သူတွေကို မျက်နှာမူဖို့ ကျမ အာရုံ စူးစိုက်ထားမှ ဖြစ်မယ်။ အဖွဲ့သားတွေရဲ့ စိတ်ဖိစီးနေတဲ့ မျက်နှာတွေကို မြင်လိုက်ရင် ကျမ စိတ်ထွေပြား သွားနိုင်တယ်။

အင်ဒါဆင်က တချက်လေးမှ မဆိုင်းပါဘူး။ အင်တာဗျူး ကြည့်ရှုရန်

“ခင်ဗျားတို့ ပါတီဝင်တွေထဲက တချို့က သမ္မတ ဘိုင်ဒင်အနေနဲ့ နောက်ဆုတ်သင့်တယ် လို့ပြောနေကြတယ်။ ဘယ်လို တုန့်ပြန်ချင်လဲ”

“ဒီမှာရှင့် လူတွေက စကားရည်လုပွဲမှာ အမှတ်ရဖို့ အဓိကထားကြတယ်။ ဒါပေမယ့် ဒီရွေးကောက်ပွဲနဲ့ အမေရိကန် ပြည်ထောင်စုရဲ့ သမ္မတ နေရာဆိုတာ အချက်အလက်၊ အကြောင်းအရာတွေပေါ် တည်ရပါတယ်။ ဒေါ်နယ်ထရမ့် က ထပ်ခါ ထပ်ခါ အလိမ်အညာတွေပဲ ပြောနေခဲ့တာ။ အချက်အလက်ကို ဂရုမစိုက်ဘူး။ ဇန်နဝါရီ ၆ ရက်က အဖြစ်အပျက်ကို သူဖုန်းကွယ် ငြင်းပယ်ဖို့ ကြိုးစားတယ်။ နိုဝင်ဘာ ရွေးကောက်ပွဲမှာ ရှုံးရင် ရလာဒ်ကို လက်ခံမလားဆိုတဲ့ မေးခွန်းကို တိတိပပ မဖြေဘူး။ သူက အမေရိကန် နိုင်ငံရဲ့ အရေးအကြီးဆုံးဖြစ်တဲ့ လွတ်လပ်ခြင်းဆိုတဲ့ အယူအဆ၊ အမျိုးသမီးတွေ အနေနဲ့ ကိုယ့်ခန္ဓာကိုယ်နဲ့ ပတ်သက်တဲ့ ဆုံးဖြတ်ချက်တွေ၊ ရွေးချယ်မှုတွေ လွတ်လပ်စွာ လုပ်ပိုင်ခွင့်တွေအကြောင်း မေးခွန်းကို ဝေ့လည်ကြောင်ပတ် လုပ်နေခဲ့တယ်။” ကိုယ်ဝန်ပျက်ကျတဲ့ အမျိုးသမီးတွေကို အရေးပေါ် ကျန်းမာရေးစောင့်ရှောက်မှုပေးဖို့ ငြင်းပယ်ခံရတဲ့ အဖြစ်အပျက်တွေ ကျမ ထောက်ပြတယ်။ အင်ဒါဆင် က ကျမပြောစကားကို ကြားဖြတ်ပြီး သမ္မတဟောင်း အနေနဲ့ ဒီကိစ္စကို သေသေချာချာ ပြောဖို့ အခွင့်အရေးမရခဲ့ဘူး လို့ ပြောတယ်။

ကျမက ထရမ့်အနေနဲ့ သမ္မတ တာဝန်ထမ်းဆောင်နေတုန်းကလဲ လွှတ်တော်ကို တိုက်ခိုက်ဖို့ လှုံ့ဆော်ခဲ့တဲ့ အကြောင်း ပြန်ထောက်ပြလိုက်တယ်။ ပါတီနှစ်ရပ်လုံးက ထောက်ခံခဲ့ကြတဲ့ အခြေခံအဆောက်အအုံဆိုင်ရာ ဥပဒေနဲ့ ဘိုင်ဒင်ရဲ့ နေ့စဥ် တာဝန်ထမ်းဆောင်ပုံတွေကို ကျမ မြင်သမျှ ပြောပြတယ်။ အမေရိကန် ပြည်သူတွေ လုံခြုံအေးချမ်းစွာ နေနိုင်စေဖို့ အထူးစစ်ဆင်ရေး အစည်းအဝေးခန်းမထဲမှာ နေ့စဥ် အစည်းအဝေးပေါင်းများစွာ လုပ်ပြီး ထောက်လှမ်းရေးနဲ့ စစ်ရေးအချက်အလက်ပေါင်းများစွာကို သတိကြီးစွာ အကဲဖြတ် သုံးသပ် ဆုံးဖြတ် ရတာတွေ၊ ကမ္ဘာ့စင်မြင့်ထက်မှာလဲ တခြားနိုင်ငံခေါင်းဆောင်များစွာဟာ ဘိုင်ဒင်ရဲ့ အတွေ့အကြုံ၊ ပညာဉာဏ် တို့ကနေ အကြံညဏ် ယူကြရတာတွေကို ထောက်ပြတယ်။

“ဒါ့ကြောင့် လွန်ခဲ့တဲ့ ၃ နှစ်ခွဲလုံးလုံး ကျမ မျက်မြင်သက်သေ ဖြစ်ခဲ့ရတဲ့ သူ့ လုပ်ရည်ကိုင်ရည်တွေကို မျက်ကွယ် ပြုပြီး ပြီးခဲ့တဲ့ မိနစ် ၉၀ အတွင်း ဖြစ်ပျက်ခဲ့တာတွေအတွက် ရှင်နဲ့ ထိုင်ငြင်းမနေနိုင်ဘူး” လို့ နိဂုံးချုပ်လိုက်တယ်။

အင်ဒါဆင်က “ဒီစကားရည်လုပွဲကို ခင်ဗျားတို့ဘက်က လုပ်ချင်ခဲ့တာ မဟုတ်လား” လို့ ထပ်မေးတယ်။ “ဒီနေ့ ည သမ္မတကြီးရဲ့ အခြေအနေကို ခင်ဗျားလဲ မြင်တာပဲ။ နည်းနည်းလေးမှ မစိုးရိမ်ဘူးလား” လို့ ထပ်ပြော တယ်။

ကျမ အမှန်အတိုင်း ပြောရမှာပေါ့။

“စကားရည်လုပွဲ ပြီးပြီဆိုရင် လူတွေက ဒီလို မေးခွန်းတွေ မေးကြ၊ ပြောကြတာ ထုံးစံပဲ။ ကျမ သဘောပေါက်ပါ တယ်။ ဒါပေမယ့် အားလုံး မေ့မထားသင့်တာကတော့ ခုန စင်မြင့်ပေါ်က ပုဂ္ဂိုလ်နှစ်ဦး အနက် တစ်ဦးကို နိုဝင်ဘာ ကျရင် ရှင်တို့ ရွေးချယ်ရတော့မယ်။ ထိခိုက်နိုင်ခြေ ဘယ်လောက်ကြီးသလဲ ဆိုတာ သတိပြုစေချင်တယ်။ ဒီစင်မြင့်ပေါ်က နှစ်ယောက်အနက် တစ်ယောက်ကပဲ ဒုသမ္မတရဲ့ ထောက်ခံမှုကို ရပါတယ်။ အဲ့ဒါ ဂျိုးဘိုင်ဒန်ပဲ”

အင်ဒါဆင်က အတင်းစကားဖြတ်ဖို့ ကြိုးစားပေမယ့် ကျမက စကားအဆက်မခံဘူး။

“ဒေါ်နယ် ထရမ့်ကို ထောက်ခံပေးဖို့ မိုက်ခ်ပန့်စ်ကို ဘယ်လိုမှ စည်းရုံးလို့ မရဘူး မဟုတ်လား။ ဒါ့ကြောင့် သူပြောသမျှ ခေါင်းညိတ် ၊ သူလုပ်သမျှ ထောက်ခံမယ့် လူတစ်ယောက်ကို အသည်းအသန် လိုက်ရှာနေရတာလေ။ ဘာ့ကြောင့်လဲ သိလား။ ဘယ်သူပဲ မိုက်ခ်ပန့်စ်နေရာ ရောက်ရောက် အဲ့ဒီလူဟာ နိုင်ငံ့ မျက်နှာထက် ဒေါ်နယ်ထရမ့် မျက်နှာကို ပဲ ကြည့်ရတော့မှာ”

အင်ဒါဆင်က စကားရအောင် ဆက်ပြောတယ်။ “ဒီနေ့ည စင်ပေါ်က ပုဂ္ဂိုလ် နှစ်ယောက်စလုံး ခင်ဗျားလို ချက်နဲ့ လက်နဲ့ မပြောခဲ့ကြဘူး”

အင်ဒါဆင် ကင်မရာဘက် လှည့်ပြီး နိဂုံးချုပ် စကားပြောနေတုန်း ကျမက စာရွက်ငယ်တစ်ခုပေါ်မှာ “ဘာထပ်ပြောသင့်သေးလဲ” ရေးပြီး ကျမ ဝန်ထမ်းဘက် အသာထိုးပေးလိုက်တယ်။

သူတို့က “၃ နှစ်ခွဲ နဲ့ မိနစ် ၉၀ ဆိုတဲ့အချက်ရယ် ၊ မိုက်ခ်ပန့်စ် အကြောင်းရယ်ကို ဖိပြောဖို့ ပြန်ရေးပေး ကြတယ်။ ဒါပြီးတော့ တခြား မီဒီယာတွေနဲ့ ကျမ ဆက်ပြီး အင်တာဗျူးတယ်။

CNN က နောက်ပိုင်း ဆက်ပြီးတော့ လွှင့်တဲ့ စကားဝိုင်းမှာတော့ အစီအစဥ်တင်ဆက်သူ ဂျွန်ကင်းက အင်ဒါဆင်ကူးပါးကို “ခင်ဗျား ဒုသမ္မတနဲ့ အင်တာဗျူး ကျနော် ကြည့်လိုက်တယ်။ ကျနော့်တသက် နိုင်ငံရေး လုပ်ထုံးလုပ်နည်း အလွဲတွေ အများကြီး တွေ့ဖူးပါတယ်။ ပြောရရင် ကင်မလာ အစွမ်းပြခွင့်မရအောင် သုံးနှစ် လုံးလုံး သူတို့ ထိန်းထားခဲ့ကြတာပဲ။ ခုတော့ သူမအစွမ်းအစကို မြင်ကြရပြီ။ သိပ်အလားအလာရှိတယ်နော်။ နှုတ်စ လျှာစ သိပ်ကောင်းတယ်။ မျိုးဆက်ပွား ကျန်းမာရေးဆိုင်ရာ အခွင့်အရေးနဲ့ လူမည်း ကိစ္စရပ်တွေနဲ့ ပတ်သက် လာရင် သူမကို ရထားတာ ပါတီအတွက် တကယ့်တန်ဖိုးပဲ။ အစွမ်းပြခွင့်မရတာ နာတာပဲ” ဆိုတဲ့ မှတ်ချက်နဲ့ စဖွင့်လိုက်ပါတယ်။

အခန်း(၁) – https://spacetd.com/107-days-1_zarchinyeinn

ဂျိုးဘိုင်ဒန်နှင့် ဒေါ်နယ်ထရမ့် တို့ရဲ့စကားရည်လုပွဲ စာသားဖြင့် ဖတ်ရှုနိုင်ရန် အောက်ပါလင့်ကို နှိပ်ပြီး ကြည့်နိုင်ပါတယ် – https://edition.cnn.com/2024/06/27/politics/read-biden-trump-debate-rush-transcript