ထိုင်း အဓိက ဘဏ် ၃ ခု ဝန်ဆောင်မှုတွေ ယ​နေ့မှစခေတ္တပြတ်တောက်မည်

ဇွန် 13

ထိုင်းနိုင်ငံတစ်ဝန်းက သန်းနဲ့ချီတဲ့ ဘဏ်သုံးစွဲသူတွေဟာ ဇွန် 13 ဒီနေ့ ည ကစ ရက်အနည်းငယ် ဝန်ဆောင်မှုပြတ်တောက်မှာ ဖြစ်ပါတယ်။

ထိုင်း နိုင်ငံရဲ့ အကြီးဆုံးဘဏ်တွေဖြစ်တဲ့ Krungthai Bank၊ အစိုးရငွေစုဘဏ် (GSB) နဲ့ Siam Commercial Bank (SCB) တို့ က သူတို့ရဲ့ ဘဏ်စနစ်ကို ပြုပြင်ထိန်းသိမ်းမှု လုပ်မှာ ဖြစ်တဲ့အတွက် ဝန်ဆောင်မှုကို အချိန်ပိုင်းဖြတ်တောက်မှာ ဖြစ်ပါတယ်။

ဝန်ဆောင်မှု ဖြတ်ထားတဲ့အချိန်အတွင်း မိုဘိုင်းဘဏ်လုပ်ငန်း (mobile applications)၊ ခရက်ဒစ်ကတ်သုံးစွဲတာနဲ့ ATM စက်တွေကနေ ငွေထုတ်တာလိုမျိုး ဘဏ်ဝန်ဆောင်မှုတွေကို တစ်နိုင်ငံလုံး ယာယီသုံးစွဲနိုင်မှာ မဟုတ်ပါဘူး။

နိုင်ငံတကာငွေလွှဲတာ၊ ဘေလ်ပေးဆောင်တာကနေ ငွေသားထုတ်တာ နဲ့ LINE application နဲ့ ချိတ်ဆက်ထားတဲ့ Notification ပို့တဲ့ ဝန်ဆောင်မှုတွေကိုပါ ပြုပြင်ထိန်းသိမ်းမှာ ဖြစ်လို့ ဝန်ဆောင်မှုအားလုံး ဖြန်တောက်ထားမှာ ဖြစ်ပါတယ်။

သုံးစွဲသူတွေအနေနဲ့ ဖြတ်တောက်မယ့် သတ်မှတ်အချိန်မတိုင်ခင် ငွေရေးကြေးရေးကိစ္စတွေကို ကြိုတင်လုပ်ဆောင်ဖို့ အသိပေးထားတာပါ။

Krungthai Bank ရဲ့ ဝန်ဆောင်မှု ရပ်နားမယ့် အချိန်တွေကတော့ ဇွန် ၁၃ ရက် ဒီနေ့ည ည ၁၀ နာရီကနေ မနက်ဖြန်၊ ဇွန် ၁၄ ရက် စနေနေ့ ညနေ ၆ နာရီအထိ စုစုပေါင်း နာရီ ၂၀ ကြာ ပြုပြင်ထိန်းသိမ်းသွားမှာ ဖြစ်ပါတယ်။

လူသုံးများတဲ့ Krungthai NEXT app ကိုတော့ လာမယ့် ဇွန် ၂၀ ရက် သောကြာနေ့၊ မနက် ၁ နာရီကနေ မနက် ၆ နာရီအထိ ၅ နာရီကြာ အသုံးပြုနိုင်မှာ မဟုတ်ပါဘူး။

အစိုးရငွေစုဘဏ် (GSB) က သူ့ရဲ့ခရက်ဒစ်ကတ်ဝန်ဆောင်မှုတွေကို မနက်ဖြန် ဇွန် ၁၄ ရက် စနေနေ့ မနက် ၄ နာရီ ခွဲကနေ ပထမ အကြိမ်အဖြစ် စတင်မှာ ဖြစ်ပြီး ပြီးဆုံးမယ့်အချိန်ကို မသိရှိရပါဘူး။ ဒုတိယပိုင်းအနေနဲ့ မနက် ၉ နာရီကနေ ၁၁ နာရီအထိ ပြုပြင်ထိန်းသိမ်းမယ်လို့ ဆိုပါတယ်။

ဒီအချိန်တွေအတွင်းမှာ GSB ရဲ ဝန်ဆောင်မှုတွေ ကို သုံးစွဲလို့ မရဘူးလို့ဆိုပါတယ်။

Siam Commercial Bank (SCB) ရဲ့ Mae Manee application (စျေးဆိုင်သုံး app) ကို ဇွန် ၁၃ ရက် ဒီနေ့ည ၁၁ နာရီ ကနေ မနက်ဖြန် ဇွန်လ ၁၄ ရက် မနက် ၅ နာရီ အထိ နဲ့ ဇွန် ၁၆ ရက် ည ၁၁ နာရီ ကနေ ဇွန် ၁၇ ရက် မနက် ၂ နာရီ အထိ ဖြတ်တောက်ထားမှာ ဖြစ်ပါတယ်။

SCB ရဲ့ Easy Store ဝန်ဆောင်မှုကိုပြီးခဲ့တဲ့ ဗုဒ္ဓဟူးနေ့ ဇွန် ၁၁ ရက် ည ၇ နာရီကနေ ​ဇွန်လ ၁၂ ရက် မနက် ၆ နာရီအထိ ၁၁ နာရီကြာ ပြုပြင်ထိန်းသိမ်းမှု ပြုလုပ်ခဲ့ပါတယ်။

SCB ရဲ့ LINE ကနေတစ်ဆင့် Notification ပို့ပေးတဲ့ SCB Connect ဝန်ဆောင်မှုကို ဘဏ်အကောင့်ထဲ ငွေဝင်တာ ငွေထွက်တာလိုမျိုး အရေးကြီး အကြောင်းကြားချက်မှအပ ကျန်တဲ့ ကိစ္စရပ်တွေကို ဇွန် လာမယ့်၂၀ ရက် ည ၇ နာရီကနေ ဇွန် ၂၁ ရက် မနက် ၂ နာရီအထိ အသုံးပြုနိုင်မှာမဟုတ်ပါဘူး။

Ref : Nation Thailand